IGAXES
Currículum vitae
Pilar Ramallal é educadora social e pedagoga. Máster en procesos de formación, máster en intervención e emancipación con mozas e mozos en conflito social e máster en intervención e coidado familiar. Terapeuta familiar sistémica e con formación en crianza terapéutica. Actualmente completa os seus estudos no eido do apego e o acompañamento – reparación do trauma das mozas e mozos do Sistema de Protección de Menores e en tránsito á vida adulta. Participa actualmente no programa de doutoramento en ciencias da educación e do comportamento na Universidade de Vigo. Actualmente, coordina o Programa Mentor e ten experiencia técnica no acompañamento a mozas e mozos do Sistema de Protección de Menores nos últimos 14 anos.
Relatorio
“O modelo de vivenda de transición á vida adulta do Programa MENTOR”
As vivendas tuteladas e asistidas do Programa Mentor son espazos onde residen mozas e mozos do Sistema de Protección de Menores de entre 16 e 21 anos, lugares que promoven o seu desenvolvemento integral combinando criterios técnicos e a calidez profesionais. Constitúen un entorno de convivencia socioeducativa e de carácter terapéutico onde se garante unha base segura para poder dar o paso á emancipación coa maior capacidade persoal e preparación posibles. Consideramos que o acollemento residencial debe constituír unha alternativa válida á protección das mozas e dos mozos do Sistema de Protección de Menores sempre e cando lles resulte beneficioso, con criterios rigorosos, supervisión das tarefas socioeducativas, formación continua das persoas profesionais e un sólido traballo en rede. O obxectivo prioritario das vivendas tuteladas e asistidas será polo tanto, o apoio aos procesos de autonomía persoal e a promoción da participación social como base dunha cidadanía activa así como a integración, na medida que as mozas e os mozos o permiten, das historias de vida que os acompañan. No presente relatorio, preténdese facer unha achega ao modelo educativo que promoven as vivendas tuteladas e asistidas do Programa Mentor, que na actualidade son oito dispositivos con capacidade para 56 mozas e mozos.
